Mundartsymposium Bosener Mühle : Speyer

Günter Speyer, geb. 1927 in Pirmasens, lebt heute in Kaiserslautern-Hohenecken, Berufstätigkeit als Betriebswirt, bis 1988 Geschäftsführer einer Volkshochschule.

Leben und Werk

Er schreibt Gedichte und Kurzprosa in westpfälzischer Mundart und in Hochdeutsch. Zwölfmaliger Preisträger beim Bockenheimer Mundartdichterwettstreit, Veröffentlichungen in zahlreichen Anthologien, Zeitungen und Rundfunk. Buchveröffentlichungen u.a. „Des sieht mer ähnlich“ -Gedichte, Franz-Arbogast-Verlag, Otterbach.
(Daten der Biografie aus dem Zeitstand des Symposiums)

Beiträge zum Symposium

Dei Weg

Dei Weg, wer wääß,
wie weit er is?
Du gehscht un gehscht,
die Zeit geht mit.

Ob korz, ob lang,
ob grad, ob krumm,
siehscht immer bloß
des Stick, wo vorne ander leit.

Du gehscht om Morjnd,
du gehscht am Middaa,
gehscht bis zum Ohmd.
Im Sand sieht ma dei Tritt.

Gehscht mol allää,
mol haschde jemand bei der,
es geht berchnunner un berchnuff.
Un heert de Weg aa uff,
die Zeit geht weider.
Herzweg

Am Schaumberch owwe
simmer de Herzweg geloff,
extra wä‘ mir,
fer daß ich kää Herzklobbe krieje sollt.
E guder Weg,
ich hab mei Herz iwwerhaupt net gespiert.
Bloß in de Afrika-Kapell,
mit seller Madonna,
wo Gefangne gemach
un vun Marokko doher gebrung han,
do hawwich uff äämol
an die viele annre denke misse,
wo kää Händ meh gehatt han,
fer Madonne zu schnitze,
un kää Fieß meh,
fer se doher zu traa.
Do hawwich doch
mei Herz gespiert.
Frommer Wunsch

O du Sankt Wendeler Land,
leischt do so ruhich in de Hiwwel.
Dort han aa net immer bloß
Schoofherd gegrast.

Heilicher Wendelin,
du hascht dei Scheefcher im truckne.
Guck, daß mir uns do hunne
net in die Woll krie‘n.
Mundartsymposium (oder besser: Mihledichder)

Kepp voll Werder
in die Mihl getraa.
Die Sprau vum Korn geblos.
Widder un widder
im Mahlgang verribb.
E Woch lang geschafft
fer e Hand voll
Vers.
Unner Kolleeche
Zutraue

Günther Speyer

Leben und Werk

Beiträge zum Symposium